E RËNDË/ Mësuesja dhunohet nga tezja e një nxënësje në Memaliaj! Kushi: Jam e indinjuar, dhuna s'është zgjidhje

E RËNDË/ Mësuesja dhunohet nga tezja e një nxënësje në Memaliaj! Kushi: Jam e indinjuar, dhuna s’është zgjidhje

MEMALIAJ– Një ngjarje e rëndë është regjistruar ditën e djeshme në Memaliaj ku një mësuese e identifikuar me inicilaet M.H 43 vjeçe është dhunuar nga tezja e një fëmije. Mësohet se ngjarja ka ndodhur në shkollën 9-vjeçare “Nimete Progonati” në Memaliaj. Mësohet se konflikti ka nisur në momentin kur tezja kishte shkuar për të marrë mbesën e saj kur kishte përfunduar mësimi, por kjo e fundit e ka pritur duke qarë dhe duke iu ankuar se ishte bullizuar nga mësuesja. Madje pretendoi dhe se e kishte dhunuar.

Në fillim ka pasur një debat verbal mes tyre por më pas situata ka degraduar në përdorimin e dhunës ku ka ndërhyrë stafi i shkollës për të parandaluar dhe më tej konfliktin. Mësuesja pas ngjarjes ka bërë denoncimin në polici. Enke nuk kemi një reagim zyrtar në lidhje me pretendimet e vajzës, e cila ka treguar se është rrahur nga mësuesja.

Në lidhje me ngjarjen ka reaguar dhe ministrja e Arsimit dhe Sportit Evis Kushi. Përmes një postimi në Facebook ministrja shkruan se dhuna është e patolerusheme dhe se pavarësisht arsyeve ajo asnjëherë nuk është zgjidhje.

REAGIMI:

Jam shumë e indinjuar nga rasti i dhunës së ushtruar mbi një mësuese në mjediset e shkollës 9-vjeçare “Nimete Progonati” në Memaliaj. Pavarësisht arsyeve që kanë shkaktuar këtë ngjarje, dhuna nuk është asnjëherë mënyra e duhur për zgjidhjen e konflikteve. Në institucionet tona arsimore funksionojnë të gjitha strukturat e nevojshme për menaxhimin dhe zgjidhjen e situatave problematike. Edhe pse është një rast i izoluar, për të cilin u morën masa të menjëhershme që ditën e djeshme, unë shpreh solidaritetin dhe u bëj thirrje nxënësve, prindërve dhe gjithë shoqërisë që ta trajtojmë mësuesin me respektin dhe dinjitetin që meriton. Ne nuk do të tolerojmë asnjë rast dhune, as ndaj nxënësve e as ndaj mësuesve, atyre që edukojnë me dashuri fëmijët tanë dhe përgatisin me përgjegjshmëri brezat e ardhshëm. Dua të garantoj të gjithë prindërit që ne do të vazhdojmë të punojmë me përkushtim dhe do të marrim të gjitha masat që shkolla të jetë gjithmonë një mjedis i sigurt, i ngrohtë dhe i shëndetshëm për edukimin dhe mirëqenien e nxënësve tanë.