SKRAPAR– Një 36-vjeçar është dhunuar dhe mbajtur peng për 2 orë në Çorovodë. Përmes një njoftimi për mediat Policia bën me dije se është vënë në pranga autori i identifikuar me inicialet A.K. Ngjarja raportohet të ketë ndodhur për motive të dobëta. 58-vjeçari, i arrestuar nga Policia e ka dhunuar dhe më pas marrë peng 36-vjeçarin në një rrugë të pafrekuentuar të Çorovodës. Pas kontrollit në banesë i janë gjetur dhe sekuestruar drogë dhe municion luftarak.
NJOFTIMI I POLICISË:
Shërbimet e Komisariatit të Policisë Skrapar, si rezultat i administrimit të menjëhershëm të kallëzimit të një 36-vjeçari se një shtetas i kishte hequr lirinë, si dhe e kishte kanosur dhe dhunuar, kanë organizuar dhe kanë finalizuar në bashkëpunim me specialistët e Seksionit për Hetimin e Narkotikëve dhe Trafiqeve të Paligjshme të DVP Berat, operacionin policor të koduar “Mix”, si rezultat i të cilit u kap dhe u vu në pranga shtetasi A. K., 58 vjeç, banues në Skrapar.
