ELBASAN– Një ngjarje e rëndë është regjistruar ditën e djeshme në Elbasan. Raportohet se një 34-vjeçare ka humbur tragjikisht jetën pas një aborti të kryer në Spitalin e Elbasanit. Në njoftimin zyrtar të bërë publik për mediat blutë e Elbasanit bëjnë me dije se e reja është paraqitur për herë të parë në Maternitet rreth orës 12:00 të ditës së djeshme ku ka kryer një procedurë aborti dhe më është larguar për në banesë.
Por pas kthimit në banesë rreth orës 18:00 ajo ka shfaqur komplikacione. Duke parë situatën ajo është nisur sërish drejt Maternitetit nga familjarët ku fatkeqësisht ka ndërrurar jetë. Lidhur me këtë ngjarje policia bën me dije se ka marrë nën hetim dy mjekë, konkretisht A.P. 56 vjeç dhe B.Gj. 60 vjeç nën akuzën e “Neglizhenca në trajtim mjekësor”.
NJOFTIMI I POLICISË:
Më datë 30.01.2023, rreth orës 12:00, një shtetase 34 vjeçe është paraqitur në ambientet e Maternitetit të Elbasanit, ka kryer një procedurë aborti dhe më pas është larguar në banesë.
Rreth orës 18:00 të së njëjtës ditë, dyshohet se për shkak të komplikimeve të gjendjes shëndetësore, kjo shtetase ka njoftuar shërbimet e ambulancës, të cilat e kanë transportuar atë në Maternitetin e Elbasanit, ku kjo shtetase ka humbur jetën.
Për këtë rast, oficerët e Policisë Gjyqësore të Prokurorisë pranë Gjykatës së Rrethit Gjyqësor Elbasan kanë iniciuar procedimin penal për shtetasit A. P., 56 vjeç dhe B. Gj., 60 vjeç, mjekë në Maternitetin e Elbasanit, për veprën penale “Neglizhenca në trajtimin mjekësor”. Vijon puna nën drejtimin e Prokurorisë, për zbardhjen dhe dokumentimin e plotë ligjor të këtij rasti.
