KORÇË– Një ngjarje e rëndë është regjistruar këtë të enjte në Korçë ku një grua është paraqitur në spital me këmbë të thyer pas dhunës së bashkëshortit. Raportohet se Diana Mulla kishte qëndruar për gjashtë ditë me këmbë të thyer në banesë pasi bashkshorti Fatos Mulla nuk e ka dërguar në spital. Mësohet se 55-vjeçarja është shtyrë nga bashkëshorti dhe ka rënë nga shkallët e banesës.
Pas gjashtë ditësh mes dhimbjesh të forta ai e ka dërguar në spital bashkëshorten. Këtu ajo ka rrëfyer se gjithçka ka ndodhur pas një sherri që ka nisur për një gotë vaj. Pas debatit verbal bashkëshorti Fatos Mulla e ka shtyrë nga shkallët. Kjo i ka shkaktuar fraktura të shumta. 55-vjeçarja është me aftësi të kufizuar pasi ka pësuar paralizë dhe vuan nga zemra.
Sipas mjekëve të spitalit të Korçës në kushtet ku ndodhet zonja ajo mund ta ketë të pamundur përdorimin e këmbës së djathtë. Ndërkohë Fatos Mulla është shoqëruar në Polici dhe po merret në pyetje nga efektivët. Policia ka nisur hetimet dhe po punon për zbardhjen e plotë të rrethanave të ngjarjes.
