TIRANË– Një ngjarje e rëndë është regjistruar mesditën e kësaj të shtune në zonën e “Freskut” në kryeqytet. Një 23-vjeçar i identifikuar me inicialet G.C pas një sherri të çastit për motive të dobëta ka tentuar të vrasë me thikë 25-vjeçarin e identifikuar me inicilaet A.H, i cili është dërguar menjëherë në spital ku ndodhet në kujdesin e bluzave të bardha. Ndërkohë autori menjëherë pas krimit ka tentuar të largohet me makinë e tij tip “Audi” po është ndaluar pak minuta më vonë dhe është vënë në pranga.
NJOFTIMI I POLICISË:
Goditi me mjet prerës, në pjesë të ndryshme të trupit, një shtetas dhe u largua, falë reagimit në kohë dhe veprimeve të shpejta dhe profesionale nga Policia, kapet dhe vihet në pranga autori i dyshuar. Sekuestrohet automjeti i përdorur nga autori i dyshuar. Shërbimet e Komisariatit të Policisë Nr. 4, pas marrjes së njoftimit se te Fresku, shtetasi G. C., 23 vjeç, gjatë një konflikti për motive të dobëta, dyshohet se ka goditur me mjet prerës shtetasin A. H., 25 vjeç, kanë organizuar menjëherë punën për kapjen e autorit të dyshuar. Falë veprimeve të shpejta dhe profesionale, brenda një kohe rekord, shërbimet e Komisariatit të Policisë Nr. 4, kapën dhe arrestuan, për veprat penale “Vrasja me dashje” mbetur në tentativë, dhe “Prodhimi, mbajtja, blerja apo shitja pa leje e armëve të ftohta”, shtetasin G. C.
Shtetasi A. H., aktualisht ndodhet në spital, nën kujdesin e mjekëve. Në cilësinë e provës materiale u sekuestrua automjeti tip “Audi”, i autorit të dyshuar. Materialet i kaluan Prokurorisë, për veprime të mëtejshme procedurale.
