TROPOJË– Një turiste franceze dhe një belge, të cilat kishin ardhur për të vizituar Valbonën kanë humbur jetën këtë të martë pasi ranë aksidentalisht në një greminë në zonën e “Qafë Valbonës”. Moti i keq me mjegull dhe terreni i thepisur e vështirësoi punën e Policisë, të cilët pas disa orësh mbërrritën në vendin ku ranë turistet dhe gjetën trupat e pajetë të tyre. Por nxjerrja e trupave të pajetë është e vështirë. Në ndihmë të Policisë së Tropojës kanë mbërritur ekipet e Ndërhyrjes së Shpejtë dhe Emergjencat Civile të Ministrisë së Mbrojtjes pasi për shkak të terrenit të vështirë helikopteri e ka të pamundur të ulët.
NJOFTIMI I POLICISË:
Pas njoftimit se dy turiste të huaja, duke eksploruar zonën e Valbonës, ishin rrëzuar për shkak të terrenit të thepisur dhe kishin rënë në greminë, shërbimet e Komisariatit të Policisë Tropojë, ato të Drejtorisë Vendore dhe të Policisë Kufitare, së bashku me ekipin mjekësor, janë nisur menjëherë në drejtim të vendit ku kishin rënë dy turistet.
Pavarësisht territorit shumë të vështirë dhe motit të keq me mjegull dhe me borë, shërbimet e Policisë, pas shumë kërkimesh, kanë bërë të mundur që në vendin e quajtur “Qafë Valbonë”, të gjenin trupat e pajetë të dy turisteve, shtetases belge B. M. dhe shtetases franceze J. B.
Në ndihmë të shërbimeve policore është nisur menjëherë skuadra alpine e FNSh Shkodër, pasi për shkak të terrenit shumë të vështirë dhe motit të keq, punonjësit e Policisë që ndodhen në vendngjarje, e kanë të pamundur nxjerrjen e trupave nga humnera. Po për shkak të motit të keq, edhe helikopteri nuk ka mundur të ulet në vendin ku janë gjetur të pajeta turistet.
Për të mundësuar nxjerrjen e trupave të pajetë, shërbimet e Policisë vendore dhe të asaj kufitare, si dhe skuadra alpine, po bashkëpunojnë me Emergjencat Civile dhe me Ministrinë e Mbrojtjes.
Grupi hetimor i Drejtorisë Vendore të Policisë Kukës ndodhet në vendngjarje dhe në drejtimin e Prokurorisë, po punon për zbardhjen e rrethanave të kësaj ngjarjeje dhe për përcaktimin e shkakut të humbjes së jetës së dy turisteve.
