I pari ishte Enver Zymberi (Zymeri). Efektivi i Njësisë Speciale të Kosovës (ROSU) do të vritej mbrëmjen e 26 korrikut 2011 nga një snajper në afërsi të pikës kufitare me Serbinë, në Bërnjak. Ngjarja “ndezi” Kosovën. Tentativa për të shtrirë sundimin e ligjit në veri të vendit pati pasoja.
12 vite më pas duket sikur koha në veri të Kosovës ka ndaluar dhe funksionon vetëm në një drejtim, atë të destabilitetit.
I njëjti skenar me të njëjtat pasoja.
12 vjet nuk kanë qenë të mjaftueshme për autoritetet e Prishtinës për të bërë “zap” eklavën serbe e cila bën çfarë i do qejfi brenda në territorin e Kosovës.
Në orët e para të mëngjesit të këtij 24 shtatori ra në krye të detyrës rreshteri i Policisë së Kosovës, Afrim Bunjaku. Edhe ai ra pre e të shtënave nga arma vrasëse e një serbi kriminel që kishte hyrë në territorin e Kosovës me një mision: Për të vrarë sa më shumë shqiptarë. Babai i dy djemve ishte njeriu më i pafat i atyre orëve të para mëngjesi. Agu do të vinte vetëm pak orë më pas, por tanimë Afrim Bunjaku ishte një hero më shumë për Kosovën, ai kishte mbyllur sytë përgjithmonë!
Një hero më shumë…në kohë paqeje!
Bill Klinton do të deklaronte ditën e çlirimit të Kosovës në 12 qershor 1999: “Ne bëmë luftën, ju bëni paqen”!
E kuptuar thjeshtë, lufta ka mbaruar 24 vite më parë. Edhe sikur Vuçiçi të shkojë dhe t’i futet në shtrat Putinit, luftë në Kosovë nuk ka për të patur më. Lufta është fituar! Paqja duhet garantuar me çdo mjet!
Sot në veri të Kosovës hyjnë dhe dalin pa u shqetësuar kriminelë, ish të burgosur, terroristë serbë, persona që kanë kryer krime lufte në Krime në 2014 dhe sot në pjesët e tjera të Ukrainës, mercenarë të Wagner, ithtarë të Putinit, nostalgjikë të Millosheviçit, emra të skeduar dhe të njohur për masakra në Bosnje dhe Kosovë.
Të gjithë vrasës! Lëvizin të lirë se atje (në veri) s’ka ligj!
Detyra që kërkohet sot është shtrirja e sundimit të ligjit në çdo cep të territorit të Kosovës, vetëm kaq. Madje edhe me çdo çmim, sot, në mënyrë që pas 5-10-12 apo 15 vitesh, Kosova të mos jetë ende duke numëruar policët që vriten nga armët e kriminelëve dhe terroristëve serbë!
/ Newszone
