TIRANË– Mjeku Ilir Topi i ftuar tregoi në emisionin “Stay Tuned” me moderatoren Valbona Mhilli se gjithmonë e ka ndjekur etiketimi “djali i Flamur Topit” sidomos kur ishte fëmijë ku në disa raste i kanë krijuar dhe ‘mini-trauma’ të vogla. Topi tha se prindërit e tij kanë pritshmëri të larta për të megjithëse kritikat nga ta kanë qenë gjithmonë konstruktive.
“Babi që në vitet ’60 është pioner i letërsisë fantastiko-shkencore. Është gjini shumë origjinale në të gjithë botën sepse tregon aventurat që ndodhin në trup mes leukocitet dhe mikrobet, luftërat epike që ndodhin mes tyre në emër të jetës së fëmijëve. Janë të bukura të veçanta, nuk janë beteja mes qindra mijërave, por janë beteja ‘miliarda kundër miliardave’. Janë beteja epike të bukura. Është në proces dhe një novelë tjetër grafike, e kam bërë bazuar në një nga librat e babit “Lufta për jetën:” që tregon betejat interesante që ndodhin çdo ditë në jetën tonë. Babi ka dashuri për emisionin. Nuk është rastësi që e ka mbajtur për 60 vite. Është rekord botëror. Nuk ka asnjë gazetar në botë që t’a ketë mbajtur për 60 vite rresht çdo javë pa asnjë ndërprerje. Imagjino t’i thuash diku shko diku 60 vite rresht, edhe sikur në një kafe, nuk e bënte kurrë se do dilte diçka. Babi edhe kur kishte diçka për të bërë bënte regjistrimin dhe pastaj shkonte atje ku kishte për të shkuar. Përkushtimi i babit për emisionin ka qenë maksimal, de falë tij ka zgjatur kaq shumë pasi gjithmonë ka pasur turbulenca e bërryla por babi ka qëndruar fort. Vëmendja e babit kur unë drejtoja emisionin ishte maksimale, i jepte rëndësi të madhe,. Babi ishte kritik pozitiv. Ka qenë gjithmonë etiketimi “djali i doktorit” nga moshatarët, mësuesit. Atëherë ka qenë vetëm një televizion, babi ka pasur famë të madhe. Kishin të gjithë respekt për familje, por ky respekt më impononte dhe sjellje që ndonjëherë nuk i bëja me dëshirë, edhe me mësuesit. Mësuesit prisnin të isha djali, perfekt ai që nuk bën kurrë probleme. Bëra një prapësi në klasë të katërt, më ka mbetur një mini-traumë. Bëra një sherr me fëmijët e tjerë, më ngriti mësuesja në mes të klasës më tha nuk të vjen turp , pse kështu të kanë edukuar. Unë u turpërova. Ka pasur të mira, por ndonjëherë kur s’të njohin fare je më i lirë të jesh vetvetja. Bëra një status një ditë: Lum banorët e BBVip se kur i shkojnë prindërit i thonë jemi krenarë. Ata duke ndenjur kot dhe duke bërë thashetheme gjithë ditën. Këta të mitë edhe sikur të fitoja Nobelin do kishin diçka për të thënë. Në kuptimin që presin shumë. Jo se janë shumë autoritarë, ose kanë qenë të rrepte, por pritshmëritë i kanë të larta. Unë bëj diçka të mirë, më urojnë, por mbase e dinë që mund të kenë potencial më tepër. Janë dhe kritikë në forma të ndryshme , por janë edhe mbështetës”.
