Vllaznia “bie” në Shkodër, me skuadrën e Memellit që u mposht 0-2 në sfidën e javës së 6-të ndaj Egnatia-s.
Sfida nisi në malore për shkodranët, kjo pasi vendasit u ndëshkuan me karton të kuq që në minutën e 17-të, me Dragoshin që la Vllazninë me dhjetë lojtarë pas ndërhyrjes ndaj Spahiut.
Një karton dhe moment që ndryshoi sfidën, ndërsa pjesa e parë u mbyll me rrjeta të paprekura, pavarësisht përpjekjeve të të dyja skuadrave, me vendasit që i shkuan pranë golit në fund.
Në fraksionin e dytë, skuadra rrogozhinase shfrytëzoi në maksimum superioritetin numerik dhe kaloi shumë shpejtë në avantazh, Isgandarlin që shënoi në minutën e 48-të.
Një gol i cili vendosi në lëvizje mekanizmat e të dyja ekipeve, por shkodranët nuk gjetën forcën e duhur për të reaguar, ndërsa Egnatia realizoi golin e dytë dhe të sigurisë në fundin e takimit, në minutën e 90-të me “njeriun gol”, Raphael Dwamena.
0-2 dhe Egnatia shkon në kuotën e 13-të pikëve duke marrë kreun e klasifikimit, ndërsa Vllaznia rikthehet te humbja dhe mbetet me 8-të pikë në vendin e katërt.
/ Newszone
