Avokati Alban Bengasi u arrestua dy ditë më parë në aeroportin e Rinasit, teksa kishte mbërritur nga Dubai. Ai ishte shpallur në kërkim ndërkombëtar në kuadër të operacionit “Plumbi i artë” ku në pranga u vu i shumëkërkuari për disa atentate dhe ngjarje të rënda kriminale, Nuredin Dumani.
Ishte pikërisht dëshmia e Nuredin Dumanit ajo që ngarkoi përgjegjësinë penale të avokatit Alban Bengasi i cili i kishte ofruar Dumanit 120 mijë euro për të vrarë bashkëshorten.
Pse Alban Bengasi vendosi të vetëdorëzohej pranë autoriteteve pasi u arratis në Dubai?
Newszone.al mëson ekskluzivisht se avokati ka arritur një ujdi me Prokurorinë e Posaçme. Një burim i besueshëm tha për Newszone.al një ditë më parë se avokati e kishte zgjidhur çështjen me SPAK-un, duke hedhur dyshime të forta për një “pazar” mes tij dhe prokurorëve.
Gjithçka dyshohet se është skenar dhe shumë shpejt Bengasi do të lirohet nga akuzat duke fituar edhe lirinë. Ai do të lirohet nga masa e “arrestit në burg” dhe gradualisht akuzat ndaj tij do të rrëzohen një nga një.
Negociatat me SPAK, Bengasi i ka bërë që nga Dubai ku ka patur edhe korrespondenca duke kërkuar prej tyre që t’i hiqnin emrin nga kërkimi ndërkombëtar pasi do të kthehej për t’u vetëdorëzuar.
Mbi Alban Bengasin rëndojnë tre akuza, ajo e dhunës në familje e kryer në bashkëpunim, grup të strukturuar kriminal dhe kryerja e veprave penale në kuadër të grupit të strukturuar kriminal.
Akuzat që rëndojnë ndaj tij janë ndër më të rëndat, që sipas parashikimeve ligjore dënohen me të paktën 10 vite burg.
Por, pse u vetëdorëzua avokati Alban Bengasi? Cili është pazari i tij me SPAK? A do të përdoret ai në rolin e një bashkëpunëtori të drejtësisë ndaj vetes? Nëse po, kush është në target për t’u goditur përmes rrëfimeve të Bengasit?
Këto pyetje mbeten pa përgjigje sa kohë SPAK ka vendosur të bëjë pazar me një shumë të kërkuar, me njeriun që porosi vrasjen e gruas së tij te Nuredin Dumani.
120 mijë euro Dumanit për të vrarë gruan
Alban Bengasi porositi vrasësin me pagesë Nuredin Dumani, i cili sot është i penduari i drejtësisë, që të vriste bashkëshorten Blerta Bengasi, kundrejt një pagese prej 120 mijë euro.
Më herët, Bengasi kishte porositur dhunimin barbar të bashkëshortes. Bengasi dyshonte se ish-gruaja e tij e kishte tradhëtuar me shokun e ngushtë, dhe për këtë kishte nisur një seri hakmarrjesh ndaj saj, me qëllimin final për ta eleminuar.
Ai përdorte njohjen me bosët e krimit, për të realizuar qëllimin e tij, ndërkohë që nga Dumani përshkruhet si një person që pinte shumë kokainë.
Konflikti mes bashkëshortëve
Blerta Bengasi është nënë e 2 djemve, 7 dhe 18 vjeç. Pas 19 vitesh martesë, ajo dhe bashkëshorti Alban Bengasi, me profesion avokat, u divorcuan, pas mosmarrëveshjeve dhe dhunës fizike. Blerta thotë se ajo është divorcuar dhe është dëbuar nga shtëpia.
Gjyqtarja Irena Plaku vendosi, që kujdestaria e fëmijëve t’i kalonte të atit, ndërsa Blerta duhet t’i takonte fëmijët çdo të martë, të enjte dhe të shtunë, pas mësimit. Por ish-bashkëshorti Alban Bengasi nuk ia ka lënë të ëmës t’i shohë fëmijët.
Konflikti mes ish-bashkëshortëve arriti kulmin kur Bengasi e akuzonte gruan se kishte lidhje intime me shokun e tij të ngushtë. Ç’ka më pas solli edhe porositë e tij për grupet kriminale që fillimisht ta dhunonim barbarisht dhe më pas ekzekutonin kundrejt 120 mijë eurove. Porosi e cila është refuzuar nga Nuredin Dumani i cili i ka thënë, sipas dëshmive të të penduarit, se nuk do vriste kurrë një grua.
/ Ekskluzive Newszone.al
