TIRANË– Nutricionistja Diola Dosti thotë se ka një dekadë që është aktive në media, më shumë në Kosovë dhe tre vitet e fundit në Shqipëri. Në emisionin “Stay Tuned” me moderatoren Valbona Mhilli në MCN Tv, ajo u shpreh se vëmendja pas pjesëmarrjes në Big Brother nuk ishte çudi e madhe për të, ndonëse e cilëson si trampolinë në qëllimin për të cilin u fut e arriti.
“Secili nga ne duket sikur kishte një mision të vetin, unë doja të transmetoja pozitivitet, pjesën e meditimit. Edhe pse e pranoj që kishte momente që nuk arrija të meditoja, gjë e cila më tregonte se ambienti ishte goxha toksik në ato momente. Por megjithatë misioni im ka qenë që të transmetoj gjëra të bukura, mesazhe të bukura. Mendoj se e arrita. E kanë kuptuar njerëzit që kanë pasur frekuencë mendimesh të njëjtë me mua atë që doja të përçoja.”
Për librin e saj të fundit “Shëndeti si art dhe shkencë”, tregon se deri ditën e promovimit nuk e kishte prekur më parë dhe kur e ka hapur dhe shfletuar i ka dhënë një energji të mrekullueshme.
“Ai libër është bërë pas çdo faze time të meditimit. Ka informacione që dalin përtej nutricionit dhe pjatës së shëndetshme. Nuk është e rëndësishme vetëm të hash shëndetshëm por dhe sjellja e personit, energjia që të jep personi tjetër. Janë përmendur efektet e meditimit, edukimi i frigoriferit, kush ka një frigorifer të edukuar ka një trup të shëndetshëm. Është koncepti i agjërimit që unë jam shumë pro, por jo sipas kalendarit islamik, por agjërimi i shpeshtë që unë e praktikoj. Ka gjëra të padëgjuara më parë. E kam hedhur farën në 2020 dhe me zor e kam mbyllur. Janë informacione të grumbulluara nga autorë që u jam referuar.”
