LEZHË– Pesë persona janë shoqëruar në Policinë e Lezhës në lidhje me vrasjen e Nikolin Marku Lestakajt një ditë më parë në Lezhë. Të shoqëruarit janë kryesisht nga fisi i Nikulajve, e deri më tani nuk ka asnjë person të arrestuar.
Ngjarja e rëndë është regjistruar një ditë më parë në orën 18:30 në një market në zonën e fshatin Balldre në Lezhë. Nikolin Marku Lestakaj kishte marrë makinën e të vëllait për të blerë një pije freskuese në market kur pasi doli prej aty u përball me një breshëri plumbash të lëshuar drejt tij, të cilët i shkaktuan vdekjen e menjëhershme. Ai kishte pak kohë që ishte kthyer nga Britania e Madhe ku jetonte prej vitesh. Me kthimin nga athe ai bënte lëvizje të kufizuara. Deri më tani Policia e Lezhës dyshon se kemi të bëjmë me një hakmarrje të fisit Nikulaj. Ngjarja u regjistrua tre muaj pasi u vra Ardian Nikulaj në Lezhë. Hasmëria mes dy fiseve vijon prej shumë vitesh ku shumë burra janë vrarë.
