TIRANË– Detaje të reja kanë dalë në dritë në lidhje me ngjarjen e rëndë të regjistruar mesditën e sotme në Paskuqan ku ish-dhëndri Dan Hutra qëlloi me breshëri kallashnikovi ndaj familjes së ish-gruas pasi u preu rrugën. Mësohet se viktimat e sulmit me armë janë Mevlute Hysa 30 vjeçe, (motra e ish-bashkëjetueses së tij) dhe Hasime Dafku 30 vjeçe, (e fejuara e vëllait të ish-bashkëjetueses). Ndërkohë të plagosura kanë mbetur Elena Hysa, 35 vjeçe, dhe Kujtime Hysa, 60 vjeçe (ish-bashkëjetuesja e tij dhe nëna e saj).
Çifti ishin ndarë prej kohësh pas konflikteve të shumta në familje. Por këtë të mërkurë Kutra u zuri pritë pranë shtëpisë dhe hapi zjarr me kallashnikov ndaj tyre. Për pasojë u regjistruan dy viiktima dhe dy të plagosura që janë dërguar me urgjencë drejt spitalit të Traumës. Pas ngjarjes Hutra është larguar me shpejtësi. Policia është vënë në ndjekje të tij.
NJOFTIMI I POLICISË:
Paskuqan, Tiranë/Informacion paraprak Më datë 01.03.2023, rreth orës 12:30, në rrugën “Rustem Haklaj”, në Kodër-Kamzë, shtetasi Dan Hutra, rreth 40 vjeç, ka plagosur me armë zjarri shtetaset Elena Hysa, 35 vjeçe, dhe Kujtime Hysa, 60 vjeçe (ish-bashkëjetuesja e tij dhe nëna e saj) dhe ka vrarë me armë zjarri shtetaset, Mevlute Hysa 30 vjeçe, (motra e ish-bashkëjetueses së tij) dhe Hasime Dafku 30 vjeçe, (e fejuara e vëllait të ish-bashkëjetueses). Autori i dyshuar është shpallur në kërkim dhe vijon puna për kapjen e tij. Do të ndajmë me publikun foton e autorit të dyshuar dhe mirëpresim çdo informacion për vendndodhjen e tij. Autori i dyshuar është arrestuar për dhunë në familje në datën 16.06.2022, dhe është liruar me datë 16.02.2023. Më parë, ai ka qenë i dënuar për vrasjen e bashkëshortes së tij, ngjarje e ndodhur në vitin 2007, në Kukës.
