VLORË– Gledi Abazi dhe Eraldo Pushaj, të dy 34 vjeç janë vënë në prangat e Policisë së Vlorës këtë të mërkurë pasi u kapën duke transportuar nëntë emigrantë të paligjshëm. Përmes një njoftimi për mediat blutë e qytetit bregdetar bëjnë me dije se dy të rinjtë banues në Tiranë u arrastuan nga forcat “Delta” në aksin rrugor Vlorë-Qeparo. Emigrantët e paligjshëm ishin ndarë në dy makina, të cilat u sekuestruan në cilësinë e provës materiale.
NJOFTIMI I POLICISË:
Vijojnë operacionet për goditjen e veprimtarisë kriminale të dhënies ndihmë për kalim të paligjshëm të kufirit. Finalizohet operacioni policor i koduar “Border 9”, i zhvilluar nga DVKM Vlorë, në bashkëpunim me Forcën Speciale “Delta” dhe Seksionin për Hetimin e Trafiqeve të Paligjshme dhe Narkotikëve në DVP Vlorë. Transportonin me 2 automjete, kundrejt pagesës, 9 emigrantë nga vendet e treta, vihen në pranga 2 shtetas. Sekuestrohen 2 automjetet me të cilat transportoheshin emigrantët. Shërbimet e Policisë Kufitare Vlorë, në bashkëpunim me Forcën Speciale “Delta” dhe Seksionin për Hetimin e Trafiqeve dhe Narkotikëve në DVP Vlorë, në vijim të operacioneve për parandalimin, evidentimin dhe goditjen e dhënies ndihmë emigrantëve nga vendet e treta, kundrejt pagesave, për të kaluar ilegalisht kufirin, bazuar dhe në infomacionet e siguruara nga inteligjenca informative, kanë finalizuar operacionin policor të koduar “Border 9”, për goditjen e një tjetër rasti të kësaj veprimtarie të kundërligjshme. Si rezultat i këtij operacioni, në aksin rrugor Vlorë-Qeparo, u kapën dhe u ndaluan shtetasit G. A., 34 vjeç dhe E. P., 34 vjeç, të dy banues në Tiranë. Këta shtetas, në bashkëpunim me njëri-tjetrin, po transportonin kundrejt pagesave, 9 emigrantë nga vendet e treta të cilët kishin si qëllim kalimin e kufirit në mënyrë të kundërligjshme. 2 automjetet u sekuestruan në cilësinë e provës materiale. Vijojnë hetimet për dokumentimin e plotë të kësaj veprimtarie kriminale, identifikimin dhe kapjen e shtetasve të tjerë të përfshirë. Materialet i kaluan Prokurorisë, për veprime të mëtejshme.
