TIRANË– Dy persona kanë rënë në prangat e policisë së Tiranës ndërsa tre të tjerë janë vënë në hetim pasi akuzohen se ka dhunuar një mjeke në Qendrën Spitalore Universitare “Nën Tereza”. Në prangat e bluve të Tiranës Igli Spahija dhe Bledar Bali. Pasi kanë dhunuar mjeken ata kanë dëmtuar dyert e dritaret e spitalit. Ngjarja e rëndë raportohet të ketë ndodhur rreth orës 14:00 të kësaj të mërkure. 5 personat e kanë dhunuar mjeken identitetit i së cilës nuk bëhet i ditur pasi sipas tyre ajo ka pasur neglizhencë në trajtimin e një të afërmi të tyre. Dhe gjatë momentit të arrestimit ata janë treguar agresivë dhe kanë kundërshtuar me forcë efektivët e policisë.
NJOFTIMI I POLICISË:
Tiranë. Goditën për shkak të detyrës një mjeke, dëmtuan dyert dhe dritaret e spitalit ku ajo punonte, arrestohen në flagrancë 2 shtetas, procedohen penalisht 3 të tjerë. Të arrestuarit nuk iu bindën urdhrave të punonjësve të Policisë, të cilët shkuan në vendin e ngjarjes, për të kryer veprimet procedurale.
Specialistët për Hetimin e Krimeve të Komisariatit të Policisë Nr. 4, pas marrjes së njoftimit se disa shtetas kishin goditur për shkak të detyrës një mjeke dhe kishin dëmtuar ambientet e spitalit ku ajo punonte, kanë organizuar menjëherë punën për identifikimin dhe kapjen e autorëve.
Si rezultat i veprimeve të shpejta nga shërbimet e Policisë, u arrestuan në flagrancë shtetasit I. S., 41 vjeç dhe B. B., 54 vjeç, të dy banues në Tiranë. Gjithashtu, u referuan materialet në Prokurori dhe nisi procedimi penal në gjendje të lirë për shtetasit: K. S., 50 vjeç (me precedent të mëparshëm penal), E. Xh., 47 vjeç dhe A. M., 55 vjeç.
Këta shtetas, rreth orës 02:00 të ditës së sotme, në ambientet e një spitali shtetëror, kanë goditur me grushte, për shkak të detyrës, një mjeke të këtij spitali, me pretendimin për neglizhencë mjekësore ndaj një të afërmi të tyre, që mjekohej në këtë spital, si dhe kanë dëmtuar dyert dhe dritaret e këtij institucioni.
Gjithashtu, këta shtetas nuk iu janë bindur urdhrave të punonjësve të Policisë që shkuan në vendin e ngjarjes, menjëherë pas marrjes së njoftimit për këtë rast. Materialet i kaluan Prokurorisë pranë Gjykatës së Rrethit Gjyqësor Tiranë, për veprat penale “Goditje për shkak detyrës”, “Mosbindja ndaj urdhrit të punonjësit të Policisë së rendit publik” dhe “Shkatërrimi i pronës”, të kryera në bashkëpunim.
