SHIJAK– Dy punonjës të Operatorit të Shpërndarjes së Energjisë Elektrike (OSHEE) janë vënë nën hetim nga policia pas zbulimit të shtëpisë së barit dhe arsenalit të armëve në Shijak. Bëhet fjalë për elektriçistin Hamdi H. 55 vjeç dhe faturisti i zonës së Xhafzotajt, Roland V. 32 vjeç.
Ata akuzohen për shpërdorim detyre pasi gjatë kontrollit në zonë është konstatuar dhe një lidhje e paligjshme e energjisë në godinën 4-katëshe të vëllezërve Krasniqi. Ndërkohë bëhet me dije se policia po mban edhe persona të tjerë në vëzhgim pasi mund të kenë komunikim me Fredi Krasniqi, 46-vjeçarin që u arrestua ditën e djeshme në flagrancë në shtëpinë e tij, ndërsa vëllai i atij ia mbathi.
