BRITANI E MADHE– Dy organizatorët e protestës në të cilën flamuri kombëtar i Shqipërisë u vendos mbi një monument të Sir Winston Churchill dyshohet se janë trafikantë të dënuar njerëzish, shkruan The Mail on Sunday.
Vëllezërit Taulant dhe Enkeleid Omi udhëhoqën një protestë prej 1500 vetësh jashtë Parlamentit muajin e kaluar pasi Sekretarja e Brendshme Suella Braverman tha se Britania u përball me një ‘pushtim’ të emigrantëve të paligjshëm. Ata udhëhoqën gjithashtu festimet e ditës së pavarësisë shqiptare.
“Ne menduam se ishte e dobishme për komunitetin tonë të tregonim se nuk jemi siç quhemi. Ne nuk jemi kriminelë. Ne nuk jemi pushtues”, tha Enkeleid Omi para gazetarëve muajin e kaluar.
Mirëpo The Mail zbulon se vëllezërit Omi u deklaruan fajtorë në vitin 2015 për tentativë për të kontrabanduar një grua shqiptare në Britaninë e Madhe dhe se ata vetë kishin mbërritur në Mbretërinë e Bashkuar ilegalisht. Taulanti, 46 vjeç, pretendoi se ishte nga Kosova.
Kërkesa e tij u refuzua, por ai fitoi një apel në vitin 2006 dhe më vonë mori nënshtetësinë britanike. The Mail shkruan se vëllezërit Omi nxitën protestat pasi Braverman tha se do i kthente pas.
Më shumë se 12 mijë shqiptarë kanë kaluar këtë vit Kanalin Anglez. Shumë po kërkojnë azil, pavarësisht faktit se Shqipëria është një vend i sigurt dhe pa luftë. Marshimi i tyre shkaktoi tërbim pasi protestuesit mbuluan flamurin e Shqipërisë mbi statujën e Churchillit në Sheshin e Parlamentit. Taulanti mbajti një fjalim plot pasion.
Ai postoi në rrjetet sociale përpara protestës se demonstruesit do të ‘bashkohen dhe do t’u tregojnë atyre në mënyrë paqësore se ne nuk jemi kriminelë’.
Ai dhe vëllai u shpallën fajtorë në Gjykatën e Kurorës së Canterbury në shtator 2015 dhe u dënuan me 12 muaj burg, u pezulluan për 18 muaj dhe u urdhëruan të kryenin 200 orë shërbim në komunitet.
“Është një ironi e hidhur që ata që turpërojnë veten duke poshtëruar heroin tonë të madh të luftës Churchill, ndërsa pretendojnë se janë të pafajshëm, janë në fakt mashtrues të këqij. Ne duhet të deportojmë të gjithë kriminelët e huaj dhe ata që shkelin kufijtë tanë pa u ndëshkuar”, tha deputeti konservator, Sir John Hayes.
Vëllezërit Omi, të lindur në Shkodër në veri të Shqipërisë, tani jetojnë në Bedford. Ata janë figura me ndikim në komunitetin shqiptar në Britani. Taulanti, një ndërtues, u fotografua me yllin e popit Rita Ora në një ngjarje në shkurt 2014.
Mbrëmë Taulanti fillimisht mohoi se ishte proceduar penalisht në vitin 2015, duke sugjeruar se Taulant Omi ishte pseudonimi i tij dhe se marrëdhënia e tij e vetme me Enkeleid ishte si ‘një organizator tjetër’.
“Protesta jonë është kundër racizmit ndaj komunitetit shqiptar që nisi me deklaratën e Suella Braverman. Pavarësisht se cila është e kaluara e personave të caktuar, askush nuk ka të drejtë të shfaqë dhe të mbështesë racizmin ndaj një komuniteti të tërë”, tha ai.
