HIMARË- Ritvan Rredhi, Ylber Troci dhe Sali Gaxha kanë rënë në prangat e Policisë së Himarës këtë të shtunë pasi akuzohen si autorë të gjashtë vjedhjeve të ndodhura në zonat Livadh, Dhërmi dhe Kudhës. Të tre në bashkëpunim me njëri-tjetrin futeshin në banesa të ndryshme nga ku kanë marrë sende personale, pajisje elektrike, vegla pune, biçikleta, aparate celulare, të cilat më pas i shisnin në qytete të ndryshme si Gjirokastër, Vlorë dhe Sarandë
NJOFTIMI I POLICISË:
Himarë. Finalizohet operacioni policor i koduar “Livadhi”, për zbardhjen e 6 vjedhjeve në banesa, të kryera gjatë muajve të fundit. Identifikohen, kapen dhe vihen në pranga 3 shtetas, bashkëpunëtorë për kryerjen e këtyre vjedhjeve. Sekuestrohen disa pajisje dhe sende që i shërbenin kryerjes së kësaj veprimtarie kriminale dhe 5 celularë. Specialistët e Seksionit për Hetimin e Krimeve të Komisariatit të Policisë Himarë, në bashkëpunim me Komisariatet e Policisë Vlorë, Sarandë dhe Gjirokastër, si rezultat i punës së mirëfilltë hetimore dhe operacionale, të kryer menjëherë pas denoncimeve të marra nga qytetarët, për raste të ndryshme vjedhjesh, konkretisht në zonën Livadh, Dhërmi dhe Kudhës, kanë organizuar dhe finalizuar operacionin policor të koduar “Livadhi”. Në kuadër të këtij operacioni u zbardhën 6 raste vjedhjesh, të kryera gjatë periudhës maj-qershor 2023, si dhe u identifikuan, u kapën dhe u arrestuan 3 autorët e dyshuar të tyre, konkretisht shtetasit:
-R. R., 32 vjeç, banues në Vlorë, me precedent penal në fushën e narkotikëve, i cili u lokalizua dhe u vu në pranga në qytetin e Vlorës;
-Y. T., 39 vjeç, banues në Sarandë, i cili u lokalizua dhe u vu në pranga në qytetin e Sarandës;
-S. G., 44 vjeç, banues në Tiranë, me precedent penal në fushën e vjedhjes, i cili u lokalizua dhe u vu në pranga në qytetin e Gjirokastrës.
Nga veprimet hetimore dyshohet se këta shtetas, në bashkëpunim me njëri-tjetrin, kanë vjedhur në 6 banesa të ndryshme në Himarë, sende personale, pajisje elektrike, vegla pune, biçikleta, aparate celulare, të cilat më pas i shisnin në qytete të ndryshme si Gjirokastër, Vlorë dhe Sarandë.
Në cilësinë e provës materiale u sekuestruan pinca, 1 peshore, 1 thikë, 1 distributor elektrik, disa metra kabllo elektrike dhe 5 aparate celulare.
Vijojnë veprimet hetimore për zbardhjen dhe dokumentimin e vjedhjeve të tjera që mund të jenë kryer nga shtetasit R. R., Y. T. dhe S. G.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
