DURRËS– Enriko Gjoka, 23 vjeç dhe Mariglen Mulellari, 25 vjeç të dy banues në Xhavzotaj, Durrës kanë rënë në prangat e Policisë këtë të premte pasi akuzohen për shpërndarje droge. Përmes një njoftimi për mediat ku kanë ndarë dhe pamjet nga arrestimi blutë e qytetit gregdetar bëjnë me dije se dy të rinjtë e shpërndanin lëndën narkotike në lokale të ndryshme të qytetit. Në cilësinë e provës materiale u sekuestruan 150 doza kokainë, të gatshme për tu shitur, një makinë, një peshore elektronike dhe 4 celularë.
NJOFTIMI I POLICISË:
Durrës. Finalizohet pas një periudhe 5-mujore hetimesh me metoda proaktive, operacioni policor i koduar “Qindra”, për goditjen e një rasti të shitjes në doza, të drogave të forta. Shitnin doza të lëndës narkotike kokainë, në lokalet e natës, në zonën e plazhit, kapen dhe vihen në pranga 2 shtetas.Sekuestrohen një sasi lëndë narkotike kokainë e ndarë në 150 doza të gatshme për shitje, një automjet, një peshore elektronike dhe 4 celularë. Në kuadër të intensifikimit të kontrolleve dhe aksioneve të Policisë në zonën bregdetare të qarkut, me qëllim parandalimin dhe goditjen e paligjshmërive dhe si rezultat i një hetimi 5-mujor me metoda proaktive, të iniciuar nga Policia e Durrësit dhe të kryer në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Durrës, është organizuar dhe është finalizuar operacioni policor antidrogë i koduar “Qindra”. Në bazë të provave të siguruara nga hetimi, specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, në bashkëpunim me shërbimet e Forcës së Posaçme “Shqiponja” të kësaj drejtorie, kapën dhe vunë në pranga shtetasit M. M., 25 vjeç dhe E. Gj., 23 vjeç, të dy banues në Xhavzotaj, Durrës. Nga veprimet hetimore dyshohet se këta 2 shtetas, në bashkëpunim me njëri-tjetrin, siguronin dhe shitnin doza të lëndës narkotike kokainë, kryesisht në lokalet e natës, në zonën e plazhit të Durrësit. Në cilësinë e provës materiale u sekuestruan një sasi lëndë narkotike kokainë e ndarë në 150 doza, automjeti me të cilin lëviznin këta shtetas, një peshore elektronike dhe 4 celularë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
