TIRANË– Një 27-vjeçar gjerman i identifikuar si Patrick Wellner është vënë këtë të mërkurë në prangat e policisë së Tiranës pasi ishte shpallur në kërkim ndërkombëtar nga drejtësia gjermane për shpërndarje të materialeve pornografike. I riu kishte kohë që strehohej në Tiranë në përpjekje për ti shpëtuar drejtësisë. Pritet ekstradimi i tij në Gjermani.
NJOFTIMI I POLICISË:
Tiranë. Finalizohet nga Komisariati i Policisë Nr. 2, operacioni policor i koduar “Paderborn”. Kapet dhe vihet në pranga, me qëllim ekstradimi, 1 shtetas i shpallur në kërkim ndërkombëtar për veprën penale “Prodhimi dhe shpërndarja e materialeve pornografike”. Shërbimet e Komisariatit të Policisë Nr. 2, në vijim të punës për kapjen e personave të shpallur në kërkim ndërkombëtar, në bashkëpunim me Interpol Tirana, në bazë të informacioneve të siguruara në rrugë policore, kanë organizuar dhe finalizuar operacionin policor të koduar “Paderborn”, si rezultat i të cilit u bë kapja dhe arrestimi provizor, me qëllim ekstradimin drejt Gjermanisë, i shtetasit: – Patrick Wellner, 27 vjeç, përkohësisht banues në Tiranë. Ky shtetas ishte shpallur në kërkim ndërkombëtar, pasi Gjykata Lokale e Paderborn, Gjermani, e ka dënuar me 1 vit e 8 muaj burgim, për veprën penale “Prodhimi dhe shpërndarja e materialeve pornografike”, parashikuar nga legjislacioni penal i Gjermanisë. Interpol Tirana vijon procedurat për ekstradimin e këtij shtetasi drejt Gjermanisë.
