SHKODËR– Fatmir Odri është 47-vjeçari, i cili u plagos pak orë më parë në Shkodër dhe mbërriti i gjakosur në spital. Raportohet se Odri ka marrë një plumb në shpatull. Ndërkohë përmes një njoftimi për mediat blutë e kryeqendrës së veriut bëjnë me dije se ngjarja ka ndodhur në afërsi të një lokali në lagjen “Skënderbeg“. Odri ndodhet jashtë rrezikut për jetën. Deri më tani Policia nuk ka mundur të marrë dëshminë e tij. Po hetohet ngjarja. Policia ka rrethuar zonën ku ka ndodhur ngjarja me qëllim kapjen e autorit të dyshuar.
NJOFTIMI I POLICISË:
Shkodër/Informacion paraprak Rreth orës 12:44, në sallën operative të Policisë së Shkodrës, ka mbërritur një telefonatë nga Spitali Rajonal i Shkodrës, se është paraqitur për ndihmë mjekësore dhe është jashtë rrezikut për jetën, shtetasi F. O., 47 vjeç, banues në fshatin Grudë e Re, i cili në një rrugicë në afërsi të një lokali, në lagjen “Skënderbeg”, në rrethana ende të paqarta, është plagosur me armë zjarri, në shpatull. Shërbimet e Policisë kanë rrethuar zonën dhe vijon kontrolli i saj. Grupi hetimor vijon veprimet për sqarimin e rrethanave të këtij rasti, si dhe për identifikimin dhe arrestimit e autorit/ëve të tij.
