GJIROKASTËR– Melsi Shehu, 45 vjeç është arrestuar këtë të enjte nga Policia e Gjirokastrës nën akuzën e prishjes së qetësisë publike. Përmes një njoftimi për mediat Policia bën me dije se Shehu vuri pas mesnatës muzikë me zë të lartë në lokalin e tij në zonën muzeale duke shqetësuar banorët dhe turistët. Ndërsa në momentin që efektivët kanë shkuar për të bërë shoqërimin e tij ai i ka kundërshtuar me forcë. Materialet procedurale i kaluan Prokurorisë.
NJOFTIMI I POLICISË:
Prishi qetësinë publike, duke vënë muzikë të lartë, pas mesnate, në lokalin e tij në zonën muzeale, si dhe kundërshtoi me forcë punonjësin e Policisë që ndërhyri për të ndaluar ndotjen akustike, arrestohet në flagrancë 45-vjeçari. Sekuestrohen pajisjet që gjeneronin muzikën. Specialistët e Seksionit për Hetimin e Krimeve të Komisariatit të Policisë Gjirokastër, në kuadër të kontrolleve të pandërprera në të gjithë territorin e qarkut, ditën dhe natën, për të garantuar mbarëvajtjen e sezonit turistik 2023, kanë konstatuar se në lokalin në pronësi të shtetasit M. Sh., në zonën muzeale të qytetit, ishte vënë muzikë e lartë, pas mesnate, zhurmë e cila përbënte shqetësim për banorët dhe për turistët. Menjëherë pas konstatimit, njëri nga punonjësit e Policisë ka ndërhyrë me qëllim ndërprerjen e zhurmës. Shtetasi M. Sh., 45 vjeç, banues në Gjirokastër, nuk ka pranuar ta ndalojë muzikën dhe ka kundërshtuar me forcë, punonjësin e Policisë që ai të mos kryente veprimet e mëtejshme procedurale. Ky shtetas u arrestua në flagrancë nga shërbimet e Policisë, për paligjshmëritë e kryera. Në cilësinë e provës materiale u sekuestruan pajisje që gjeneronin muzikën
