MALËS E MADHE– Parandalohet ngjarja kriminale në Malësi të Madhe. Raportohet se Mark Preka, 28 vjeç është shpallur në kërkim nga Policia pasi pas një sherri për parakalim të gabuar me një 23-vjeçar të identifikuar me inicialet A.Gj ka marrë kallashnikovin dhe ka tentuar ta vrasë. Blutë e Shkodrës bëjnë me dije se falë ndërhyrjes së Policisë ai ka hedhur armën dhe është larguar. Po punohet për kapjen e tij.
NJOFTIMI I POLICISË:
Shpallet në kërkim për armëmbajtje pa leje, shtetasi M. P., dhe punohet për kapjen e tij. Sekuestrohet në cilësinë e provës materiale arma e zjarrit tip automatik. Pas një konflikti të çastit për parakalim të gabuar me automjet, midis shtetasve M. P., 28 vjeç dhe A. Gj., 23 vjeç, shtetasi M. P. është larguar dhe ka marrë armën e zjarrit tip automatik që mbante me vete. Ndërhyrja e menjëhershme e shërbimeve të Komisariatit të Policisë Vau i Dejës ka parandaluar përshkallëzimin e konfliktit midis këtyre dy shtetasve. Gjatë ndjekjes nga Policia, shtetasi M. P. ka hedhur armën e zjarrit dhe është larguar. Në vijim të veprimeve procedurale për këtë rast, ka nisur procedimi në gjendje të lirë, për veprën penale “Moskallëzimi i krimit”, për shtetasit A. H., 21 vjeç, K. Sh., 19 vjeç, R. H., 30 vjeç dhe Xh. H., 25 vjeç, të gjithë banues në fshatin Barbullush, Vau i Dejës, pasi kanë tentuar të fshehin armën e zjarrit që mbante shtetasi M. P. Vijon puna për kapjen e shtetasit M. P. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
