ELBASAN- Policia e Shtetit ka sekuestruar këtë të enjte pasuri me vlerë 150 mijë në Elbasan, të cilat ishin në pronësi të një personi të dënuar në Turqi nën akuzën e trafikut të drogës. Pasuritë ishin në pronësi të 63-vjeçarit Agron Metaj.
Pasuria e tij përfshin:
- Një objekt banimi me sipërfaqe 102.6 m2 dhe oborr me sipërfaqe 250 m2, në lagjen “28 nëntori”.
- Një objekt shërbimi (lokal) me sipërfaqe 28.4 m2, në lagjen “Haxhias”.
- Një automjet tip “Mercedes-Benz S-Class”.
NJOFTIMI I POLICISË:
DVP Elbasan/Finalizohet operacioni policor i koduar “Fasada 5”. Sekuestrohen 3 pasuri me vlerë rreth 150 000 euro, me burim aktivitetin kriminal të një 63-vjeçari të dënuar në Turqi, për trafik droge.
Specialistët e Sektorit për Hetimin e Krimeve Ekonomiko-Financiare të DVP Elbasan, në kuadër të një procedimi pasuror, të iniciuar në bashkëpunim me Departamentin e Policisë Kriminale në DPPSH, me qëllim gjurmimin, lokalizimin dhe sekuestrimin e pasurive që rrjedhin nga veprimtaritë kriminale të shtetasve të akuzuar apo të dënuar nga autoritetet e drejtësisë, brenda dhe jashtë vendit, kanë ekzekutuar vendimin e Gjykatës së Rrethit Gjyqësor Elbasan, e cila ka vendosur sekuestrimin e pasurive të shtetasit:
-A. M., 63 vjeç, banues në Elbasan, të dënuar më parë nga Gjykata e Krimeve të Rënda Ankara, për veprën penale “Trafikimi i lëndëve narkotike”. Në kuadër të këtij procedimi pasuror, është vendosur sekuestrimi i 3 pasurive me vlerë rreth 150 000 euro, konkretisht: një objekt banimi me sipërfaqe 102.6 m2 dhe oborr me sipërfaqe 250 m2, në lagjen “28 nëntori”; -një objekt shërbimi (lokal) me sipërfaqe 28.4 m2, në lagjen “Haxhias”; -një automjet tip “Mercedes-Benz S-Class”.Vijon puna për gjurmimin, lokalizimin dhe sekuestrimin e pasurive të tjera që kanë burim veprimtarinë kriminale të këtij shtetasi. Materialet procedurale i kaluan Prokurorisë, për veprime të mëtejshme.
