TIRANË- Njl tjetër efektiv policia është larguar nga radhët e Policisë së Shtetit. Bëhet fjalë për Renaton Feri. Efektivi u kap me drogë në makinë. Ai ishte pjesë e Policisë Rrugore, arrestimi i tij erdhi pas një ndjekjeje të gjatë “këmba-këmbes” nga kolegët e tij të repartit Shqiponja. Ngjarja ka ndodhur në zonën e njohur si “Pallati me Shigjeta” në kryeqytet.
Mësohet se Renato Feri kohët e fundit lëvizte me një makinë me xhama të zinj. Kur efektivët e Shqiponjave i kanë bërë thirrje të ndalojë, ai ka hapur xhamin, ka ofenduar kolegët e më pas ka shtuar shpejtësinë e makinës dhe ia ka mbathur. Por arratia zgjati pak pasi u kap pak minuta më pas në afërsi të rrethrrotullimit të TEG-ut, aty ku është zbuluar edhe fakti se ai është efektiv i Rrugores. Pas kontrollit të makinëe është gjetur edhe një sasi lëndë narkotike e llojit kanabis sativa.
Mësohet se i riu është përjashtuar nga radhët e Policisë së Shtetit nga Drejtori i Përgjithshëm Muhamet Rrumbullaku. Feri është djali i Arian Ferit, shef sektori i burimeve njerëzore në Drejtorinë e Përgjithshme të Policisë së Shtetit. Ai tashmë do të akuzohet për “kundërshtim të Punonjësit të Policisë” dhe “prodhim e shitja e lëndëve narkotike”.
