BERAT– Është gjetur i pajetë në ujërat e lumit Osum 32-vjeçari Jurgen Merkaj, i cili mëngjesin e sotëm u raportua i zhdukur nga familjarët. Ai ishte larguar nga banesa që mbrëmjen e djeshme por sot familjarët kanë bërë denoncimin në polici ku dhe kërkuan ndihmën e mediave për ta gjetur. Sipas policisë nga kqyerja e trupit nuk janë konstatuar shenja dhune në trupin e 32-vjeçarit. Newszone e raportoi me njëherë lajmin për zhdukjen e tij ku dhe publikoi foton për të ndihmuar në gjetjen e tij.
NJOFTIMI I POLICISË:
Berat/Informacion paraprak- Më datë 16.01.2023, rreth orës 15:00 në fshatin Orizaj, Berat, në ujërat e lumit Osum është konstatuar i mbytur në ujë, shtetasi J.M., 32 vjeç, banues në Berat. Për shtetasin J.M., mëngjesin e sotëm, kanë bërë kallëzim në Polici, familjarët e tij, ku kanë deklaruar se më datë 15.01.2023 është larguar nga banesa shtetasi J.M. Trupi i pajetë i 32-vjeçarit, është nxjerrë nga uji dhe do të dërgohet pranë morgut të spitalit Berat, për ekzaminime të mëtejshme. Nga këqyrja paraprake e trupit të viktimës, nuk janë konstatuar shenja dhune. Grupi hetimor po punon për sqarimin e plotë të rrethanave të ngjarjes.
