SHKODËR– Elvis Kosuri, 29 vjeç është vënë në prangat e Policisë së Shkodrës pasi akuzohet se pas një sherri për motive pronësie ka kërcënuar me armë zjarri të llojit pushkë xhaxhanë e tij. Përmes një njoftimi për mediat ku ka ndarë dhe pamjet nga arrestimi i tij blutë e Shkodrës bëjnë me dije se i riu u arrestua në kushtet e flangrancës. Në cilësinë e provës materiale janë sekuestruar arma e tipit pushkë, fishekë luftarak dhe një sasi lënde narkotike cannabis sativa që u gjetën në banesën e të arrestuarit.
NJOFTIMI I POLICISË:
Shërbimet e Komisariatit të Policisë Shkodër, menjëherë pas marrjes së njoftimit se një konflikt ndërmjet disa familjarëve mund të përshkallëzohej deri në përdorimin e armës së zjarrit, kanë organizuar punën dhe kanë shkuar menjëherë në vendngjarje, me qëllim neutralizimin e këtij konflikti. Si rezultat i ndërhyrjes së menjëhershme në vendin e ngjarjes, u kap dhe u arrestua në flagrancë shtetasi E. K., 29 vjeç, banues në fshatin Gimaj, pasi dyshohet se pas një konflikti për motive pronësie, ka kanosur me armë zjarri pushkë, xhaxhanë e tij, shtetasin Z. K., 64 vjeç, banues në fshatin Ndërlisaj, Shkodër. Në cilësinë e provës materiale u sekuestruan arma e zjarrit pushkë, disa fishekë luftarak dhe një sasi lënde e dyshuar narkotike cannabis sativa që u gjetën në banesën e 29-vjeçarit. Materialet proceduriale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
