SARANDË– Foto Papa, 23 vjeç është vënë këtë të mërkurë në prangat e Policisë së Sarandës nën akuzën e kultivimit të lëndëve narkotike. Përmes një njoftimi për mediat ku ka ndarë dhe pamjet nga operacioni blutë e Sarandës bëjnë me dije se i riu kishte mbjellë në tokën e tij në fshatin Roshan të Finiqit lëndë narkotike të llojit kanabis. Lënda narkotike u asgjesua me anë të djegies. Ndërkohë materialet procedurale i kaluan Prokurorisë.
NJOFTIMI I POLICISË:
Finiq, Sarandë/Kontrolle me shërbime nga toka dhe me dronë, për të parandaluar kultivimin e bimëve narkotike. Kishte kultivuar bimë narkotike, në tokën që kishte në posedim, kapet në flagrancë dhe arrestohet 23-vjeçari, si dhe asgjësohen nëpërmjet djegies, bimët narkotike. Shërbimet e Komisariatit të Policisë Sarandë kanë vijuar kontrollet kundër kultivimit të bimëve narkotike, dhe si rezultat, mbështetur dhe nga inteligjenca policore, kanë gjetur në vendin e quajtur “Roshan”, Finiq, në një sipërfaqe toke në posedim të shtetasit F. P., 24 bimë të dyshuara narkotike cannabis sativa. Në vijim të veprimeve procedurale për këtë rast, specialistët për Hetimin e Krimeve të Komisariatit të Policisë Sarandë arrestuan në flagrancë shtetasin F. P., 23 vjeç, banues në Finiq, për veprën penale “Kultivimi i bimëve narkotike”. Bimët e dyshuara narkotike cannabis sativa u asgjësuan nëpërmjet djegies. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
