DURRËS– Sokol Metani, 25 vjeç është vënë këtë të hënë në prangat e Policisë pasi ka tentuar që ti vjedhë me dhunë çantën një turisteje boshnjake në Durrës. Policia, e cila ka ndarë dhe pamjet nga shoqërimi i tij në Komisariat bën me dije se i riu ka tentuar të vjedhë edhe në një banesë, në lagjen 14, Durrës, në bashkëpunim me një 34-vjeçar, të identifikuar dhe shpallur në kërkim.
NJOFTIMI I POLICISË:
Shërbimet e Stacionit të Policisë Plazh, pas marrjes së kallëzimit nga një turiste boshnjake se gjatë mbrëmjes, një shtetas kishte tentuar t’i merrte me forcë çantën e saj, kanë organizuar menjëherë punën për identifikimin dhe kapjen e autorit të këtij rasti. Si rezultat i veprimeve të shpejta dhe profesionale, nga specialistët për Hetimin e Krimeve në Stacionin e Policisë Plazh, brenda pak orësh, u bë identifikimi, kapja dhe arrestimi në flagrancë i shtetasit: – S. M., 25 vjeç, banues në Fushë Krujë, për veprën penale “Vjedhja me dhunë”, mbetur në tentativë. Nga veprimet e mëtejshme hetimore ka rezultuar se ky shtetas ka tentuar të vjedhë edhe në një banesë, në lagjen 14, Durrës, në bashkëpunim me shtetasin N. C., 34 vjeç, banues në Kavajë, i cili u shpall në kërkim. Vijon puna për kapjen e tij. Materialet procedurale i kaluan Prokurorisë Durrës, për veprime të mëtejshme hetimore.
