Energjia, Tabaku letër kreut të ERE-s: Presim mbledhjen urgjente për të rrëzuar vendimin e një jave më parë

Deputetja e Partisë Demokratike, Jorida Tabaku i ka dërguar një letër drejtorit të bordit të ERE, Petrit Ahmeti, ku kërkon një mbledhje urgjente të ERE-s për të rrëzuar vendimin që bordi mori një javë më parë.

Tabaku shkruan se qeveria shqiptare e ka ndërmarrë vendimin për të shtyrë rritjen e energjisë elektrike për 100 mijë familje nga frika dhe jo nga arsyeja.

Më tej deputetja e PD-së shkruan se në këtë kohë krizë është tejet jetike që shëndeti financiar dhe ekonomik i familjeve shqiptare të jetë parësor dhe më i rëndësishëm se sa çdo gjë tjetër

Rritja e çmimit të energjisë për familjet shqiptare ishte i pabazuar dhe i motivuar politikisht  pa asnjë studim të thelluar, sikundër dhe u provua më tej.  Vendimi që u mor nga qeveria dhe nga ERE ishte abuziv.

Ndërkohë që sot është shumë e qartë që qeveria shqiptare e ka ndërmarrë vendimin për të shtyrë rritjen e energjisë elektrike për 100 mijë familje nga frika dhe jo nga arsyeja. Duke pasur parasysh situatën në të cilën ndodhen sot familjet shqiptare, gjendjen ekonomike dhe situatën e vështirë të shtresës së mesme që preket thellësisht nga kjo rritje e pamotivuar çmimi.

Meqenëse ERE ende nuk ka ndërmarrë një vendim të tillë që do t’i vijë në ndihmë 100 mijë familjeve, kërkuam mbledhjen urgjente të ERE dhe një vendim të qartë për të rrëzuar vendimin që i njëjti bord morri një javë më parë. Në këtë kohë krizë është tejet jetike që shëndeti financiar dhe ekonomik i familjeve shqiptare të jetë parësor dhe më i rëndësishëm se sa çdo gjë tjetër. Prandaj presim nga momenti në moment mbledhjen urgjente të bordit për të marrë vendimin e duhur në favor të shqiptarëve.