Pas suksesit të “Gjithçka që ke”, autori Enkelejd Lamaj kthehet te lexuesit me një histori të re që premton të trondisë deri në palcë. “Gjithçka që dua” sjell një rrëfim të errët mes Tiranës dhe Prishtinës, ku frika nuk fshihet më pas qosheve, por ecën hapur përpara nesh.
Në romanin e parë, Lamaj prezantoi vrasësin e parë serial të Tiranës dhe historinë e një gruaje që luftonte për mbijetesë. Katër vite më pas, në qendër është gazetarja Sidorela Ejlezi, tashmë një shkrimtare e njohur, e cila humb gjithçka kur bashkëshorti dhe djali i saj zhduken pa gjurmë. Një vit më pas, krimet makabre që trondisin dy kryeqytetet zbulojnë një lidhje të ftohtë: në skenat e krimit shfaqen fotografi të djalit të Sidorelës, të fshehura mes librash që ajo i njeh më mirë se kushdo.
Çfarë fshihet pas këtij misteri? Një thirrje për ndihmë, një kërcënim i drejtpërdrejtë, apo diçka edhe më e errët, e lidhur me të shkuarën? Për t’iu përgjigjur, Sidorela duhet të zbresë në territore ku e vërteta përzihet me paranojën dhe ku përbindëshi nuk është vetëm jashtë, por edhe brenda saj.
Me një stil të ngarkuar me tension dhe atmosferë psikologjike, Lamaj ndërton një thriller hipnotik, që lexuesi e përjeton si një dorë që ngadalë shtrëngohet rreth fytit. “Gjithçka që dua” është një roman që të detyron të shohësh frikën drejt në sy dhe të pranosh se ndoshta ajo ka qenë aty gjatë gjithë kohës.
Prezantimi i oarë i librit do të bëhet të premten, më 12 shtator, ora 17:00, tek instalacioni “Reja”, ku lexuesit do të kenë mundësinë të takohen me autorin Enkelejd Lamaj dhe të zbulojnë nga afër sekretet e këtij rrëfimi tronditës.
