TURQI– Presidenti turk Rexhep Tajip Erdogan ka bërë një premtim të fortë ku ka deklaruar se nëse ai ia del që të fitojë një mandat tjetër për të qenë në krye të Turqisë, ai do të jetë dhe mandati i tij i fund. Ai la të nënkuptohet se ka ardhur koha që ai të largohet nga politika dhe do të ia dorëzojë ‘stafetën të rinjve’.
“Ne do të fillojmë ndërtimin e shekullit të Turqisë me mbështetjen që kërkojmë për herë të fundit në emrin tonë nga populli ynë në vitin 2023. Ne do t’ia dorëzojmë këtë flamur të shenjtë rinisë sonë”, tha presidenti i Turqisë, gjatë një fjalimi në Samsuda.
Erdogan është në pushtet që nga viti 2003, dhe Partia e tij islamike-konservatore për Drejtësi dhe Zhvillim (AKP) shpreson të mbajnë kontrollin e vendit në zgjedhjet parlamentare dhe presidenciale në qershor të vitit 2023.
Në tetor, Erdogan kishte përsëritur dëshirën e tij për të përgatitur një kushtetutë të re turke që do të ishte “demokratike, e thjeshtë dhe vizionare”. Sipas disa vëzhguesve, kjo u interpretua si një qëllim për të modifikuar kufirin e dy mandateve presidenciale të parashikuar nga kushtetuta turke.
