TIRANË– Prokuroria e Posaçme Kundër Korrupsionit dhe Krimit të Organizuar (SPAK) ka hedhur poshtë këtë të mërkurë lajmet që qarkulluan në media se kreu i SPAK Altin Dumani po mbrohej nga Garda me masa të shtuara sigurie në shoqërimin e tij fizik dhe në banesë. Sipas SPAK, Dumani mbrohet nga Garda e Republikës në koordinim me Policinë e Shtetit konform procedurave standarte të sigurisë.
SPAK: Nisur nga publikimet në media dhe interesi i lartë publik, informojmë se: Në zbatim të akteve ligjore dhe nënligjore Drejtuesi i Prokurorisë së Posacme mbrohet nga Garda e Republikës e cila bashkëpunon dhe koordinon veprimet me Policine e Shtetit. Mbrojtja e Drejtuesit të Prokurorisë është konform procedurave standarde të miratuara.
Më herët gjatë kësaj të mërkure qarkulloi lajmi se kreu i Prokurorisë së Posaçme Altin Dumani mund të jetë kërcënuar me jetë pasi siguria e tij si në banesë ashtu dhe në shoqërimin e tij fizik ishte rritur. U raportua se para banesës së kreut të SPAK ishte vendosur një strukturë e veçantë policore ndërsa ai lëvizte me makinë të blinduar.
