TIRANË– Ish-kryebashkiaku i Bulqizës Lefter Alla vijon “betejën” e tij me Gjykatën e Posaçme Kundër Korrupsionit dhe Krimit të Organizuar ku kërkon lirimin nga burgu me arsyetimin se vuan nga probleme shëndetësore. Lidhur me këtë këtë të hënë dy ekspertë mjeko-ligjor paraqitën në GJKKO rezultatet e raportit mjekësor ndaj Allës.
Sipas ekspertëve Alla ka probleme shëndetësore me zemrën dhe se qëndrimi në qeli nuk është i përshtatshëm për gjendjen e tij. Ndaj edhe kërkon lirimin, me pretendimin se në qeli i rrezikohet jeta, pasi nga momenti në moment mund të pësojë ndonjë krizë. Por GJKKO nuk ka marrë një vendim për “fatin” e Lefter Allës. Ndërkohë seanca e radhës është caktuar të mbahet më 12 qëershor.
