TIRANË– Grupimi që mbështet deputetin Enkelejd Alibeaj brenda Partisë Demokratike i ka bërë thirrje këtë të premte Gjykatës së Apelit që ta shqyrtojë sa më shpejt ankimimin e bërë prej tyre në mënyrë që t’i jepet fund konfliktit lidhur me legjitimitetin e drejtimit të PD. Në një postim në Facebook përfaqësuesi ligjor i Alibeajt Indrit Sefa ka kërkuar që Apeli ta japë sa më shpejt vendimin pasi siç shkruan ai tanimë çdo vonesë është e pajustifikueshme.
POSTIMI I INDRIT SEFËS:
Gjykata e Apelit tashmë nuk ka asnjë pengesë për ti dhënë fund konfliktit gjyqësor për legjitimitetin e drejtimit të Partisë Demokratike. Partia Demokratike i kërkon Gjykatës që të shqyrtojë sa më shpejt ankimin e paraqitur nga ana e saj. I ftojë të gjitha palët ti kërkojnë Gjykatës së Apelit të Juridiksionit të Përgjithshëm të shpallë dhe të gjykojë këtë çështje në një kohë sa më të shpejt. Çdo vonesë tashmë është e pajustifikuar.
Pas shortit të hedhur ditën e sotme në Gjykatën e Apelit gjyqtarja që do të ketë në tavolinë “fatin” e Partisë Demokratike është Elona Mihali, e cila do të jetë relatorja e çështjes ndërsa trupa gjykuese do të përbëhet nga Astrit Kalaja dhe Ireida Kacerja. Gjatë seancës ishte i pranishëm dhe përfaqësuesi ligjor i Partisë Demokratike të drejtuar nga Sali Berisha Ivi Kaso. Kjo lëvizje Apelit vjen pas thirrjes që Kryetari i Komisionit Qëndror të Zgjedhjeve Ilirjan Celibashi bëri për sqarimin e kësaj çështjeje pasi sipas tij Partia Demokratike rrezikon të mos regjistrohet në zgjedhje për shkak të “ngërçit” të krijuar mes palëve.
