Rezultatet në shkollë të fëmijëve romë nga bashkitë e Elbasanit dhe Fierit, por kalimi i tyre nga çerdhja dhe kopshti në arsimin fillor, u përmirësuan dhe pritet që të përmirësohen ndjeshëm falë projektit “Nxitja dhe Ruajtja e Cilësisë së Edukimit Parashkollor dhe Fillor për Romët në Elbasan dhe Fier”. Një nismë e financuar nga Roma Education Fund përmes fondeve të Bashkimit Evropian dhe që zbatohet në Shqipëri nga organizata AmaroDrom, do të punojë edhe për përmirësimin e barazisë gjinore duke rritur pjesëmarrjen e vajzave rome por edhe fëmijëve nga bashkitë e Elbasanit dhe Fierit në arsim cilësor dhe gjithëpërfshirës.
Vetëm në vitin e parë të këtij projekti përfituan 35 fëmijë romë në Fier dhe 25 në Elbasan, të cilët u regjistruan në çerdhe dhe kopshte. Ndërkohë që gjatë gjithë projektit i cili do të zgjasë për tre vite, numri i përfituesve pritet që të arrijë në 180, ku përfshiheshin 105 vajza dhe 75 djem.
Një aspekt tjetër thelbësor i projektit është organizimi i një fushate avokimi me Ministrinë e Arsimit dhe Sportit dhe bashkitë e Elbasanit dhe Fierit, për të nxitur vendimmarrjen për uljen ose heqjen e tarifave për fëmijët romë në çerdhe dhe kopsht. Kjo synon të sigurojë një përfshirje më të gjerë dhe të barabartë në shërbimet arsimore për komunitetin rom.
Gjithashtu projekti do të punojë progresivisht edhe me prindërit romë për të rritur ndërgjegjësimin e tyre mbi aftësitë prindërore, duke përmirësuar dhe forcuar njëkohësisht aftësitë e tyre jetësore dhe të buta për të qenë të përgatitur për tregun e punës.
Një komponent tjetër i rëndësishëm i projektit ishte trajnimi i prindërve romë. U organizuan tre grupe trajnimi për përdorimin e portalit qeveritar e-Albania dhe tre seminare mbi prindërimin e mirë dhe aftësitë jetësore, secili me nga 10-12 prindër. Gjithashtu, u krijuan tre klube të librarive të lodrave në qendrat komunitare, një në Elbasan dhe dy në Fier (Levan dhe Driza), për të promovuar zhvillimin intelektual dhe social të fëmijëve.
Për të siguruar që projekti po ecte sipas planit, u kryen tetë vizita monitorimi dhe u përgatitën katër raporte vlerësimi për të vlerësuar përparimin e tij. Një nga arritjet kryesore ishte organizimi i një fushate avokimi për të kërkuar heqjen ose uljen e tarifave për fëmijët romë në arsimin parashkollor, duke i bërë këto shërbime më të aksesueshme për komunitetin rom.
Projekti “Nxitja dhe Ruajtja e Cilësisë së Edukimit Parashkollor dhe Fillor për Romët në Elbasan dhe Fier” përfaqëson një hap të rëndësishëm drejt barazisë arsimore dhe integrimit të komunitetit rom në shoqërinë shqiptare. Me mbështetjen e Roma Education Fund dhe përpjekjet e palodhura të AmaroDrom, ky projekt shërben si një model suksesi për nisma të ngjashme në të ardhmen.
