TIRANË– Me ardhjen e verës vijnë dhe problemet për shumë qytetarë të Tiranës që poshtë pallatit të tyre kanë lokale të ndryshme e që në këtë stinë ngrejnë muzikën në nivele të larta dhe bëjnë festa të ndryshme. Kështu këtë të shtunë dy menaxherë të një lokali në rrugën “Muatafa Matohiti”, e ka “pësuar” pasi Policia u trokiti në derë për prishje të qetësisë publike pas ankesave të bëra nga banorët. Ata janë shoqëruar në Komisarita ndërsa bokset u sekuestruan nga Policia.
NJOFTIMI I POLICISË:
Tiranë/Kontrolle intensive për parandalimin e ndotjes akustike. Prishën qetësinë publike, duke shqetësuar banorët pasi kishin vënë muzikë të lartë në një lokal, procedohen penalisht dy menaxherët e lokalit. Sekuestrohen pajisjet që gjenerojnë muzikën. Shërbimet e Komisariatit të Policisë Nr. 1, në vijim të kontrolleve për zbatimin e ligjit, si dhe në zbatim të detyrave të lëna nga Drejtori i Përgjithshëm i Policisë së Shtetit, gjatë mbledhjes me drejtuesit qendrorë dhe vendorë të Policisë, kanë intensifikuar kontrollet, me qëllim zgjidhjen e shqetësimeve të banorëve, nga muzika e lartë në lokale. Gjatë kontrolleve, në një lokal në rrugën “Muatafa Matohiti”, shërbimet e Policisë kanë konstatuar muzikë të lartë që përbënte shqetësim për banorët dhe kanë shoqëruar në komisariat dy menaxherët e lokalit. Në vijim të veprimeve, specialistët për Hetimin e Krimeve në Komisariatin e Policisë Nr. 1 referuan materialet në Prokurori ku u proceduan në gjëndje të lirë, për veprën penale “Prishja e qetesisë publike”, shtetasit E. B., 21 vjeç, dhe M. A., 22 vjeç, të dy banues në Tiranë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme. Policia e Shtetit apelon për të gjithë administratorët dhe pronarët e lokaleve dhe hoteleve, që të zbatojnë me rigorozitet ligjin dhe rregullat në lidhje me ndotjen akustike, pasi në rast të konstatimit të ndotjes akustike, shërbimet e Policisë do të sekuestrojnë pajisjet që gjenerojnë muzikë dhe do të procedojnë sipas ligjit, shtetasit përgjegjës.
