Luleshtrydhja ishte nga risitë e bujqësisë shqiptare disa vite më parë, kur fermerët e Frakullës në Fier nisën të mbillnin serat me këtë kulturë bujqësore. Por sot, pas gati një dekade, sipërfaqet e mbjella jo vetëm janë reduktuar, por për shkak të mungesës së mbështetjes nga shteti dhe fuqisë punëtore, fermerët thonë se do të braktisin përfundimisht bujqësinë.
Këta janë disa nga faktorët që po çojnë drejt kolapsit një sektor të veçantë të bujqësisë, që lulëzoi pak vite më parë në vendin tonë.
Fermerët e zonës së Frakullës në Fier, tregojnë se kanë ulur sipërfaqet e mbjella me luleshtrydhe në sera, ndërsa paralajmërojnë heqjen dorë prej kultivimit të saj.
Shteti nuk i subvencionon për materialet e ndërtimit të serave, ndërsa vazhdimisht ky sektor po has në vështirës edhe me gjetjen e fuqisë punëtore.
Nga ana tjetër edhe kryetari i njësisë administrative Frakull Dashamir Troka na pohon nëpërmjet telefonit se sipas tij, rënia e sipërfaqes së mbjellë me luleshtrydhe lidhet me emigrimin masiv të banorëve të kësaj zone.
