Nuk ka kaluar shumë kohë nga miratimi i marrëveshjes Britani-Shqipëri për sa i përket emigrantëve që qëndrojnë atje. Sipas një raporti të publikuar nga data 13 dhjetor bëhet me dije se janë kthyer rreth 1000 shqiptarë.
Sipas raportit bëhet fjalë për shqiptarë që kanë dështuar për të marrë një azil në Britani të Madhe, por edhe kthime vullnetare në Shqipëri.
Ekipet operacionale të Mbretërisë së Bashkuar dhe Shqipërisë kanë ngritur një task forcë të përbashkët për migracionin, e cila shërben si porta kryesore për të koordinuar masat dhe veprimet e specializuara operacionale për menaxhimin e migrimit të paligjshëm të shtetasve shqiptarë në MB.
Këtu përfshihen kontrollet e përforcuara për kriteret e lëvizjes së lirë në të gjitha pikat e kalimit kufitar në të gjithë vendin, verifikimet e shtuara për shtetasit shqiptarë që konstatohen se ndodhen ilegalisht në territorin e Britanisë së Madhe dhe shkëmbimi i oficerëve të lartë të policisë në të dy vendet.
Në vitin 2022 ka pasur 1888 kthime të shtetasve shqiptarë, nga të cilët 954 (51%) janë kthime të detyruara dhe 934 (49%) kthime vullnetare. Numri i kthimeve vullnetare është 90% më i lartë se në vitin 2021 (492).
“Ky është një trend i ri dhe inkurajues, të cilin e kemi parë të vazhdojë edhe në vitin 2023. Tashmë në vitin 2023, nga janari në mars, janë kthyer 795 shtetas shqiptarë. Prej tyre, 389 (49%) ishin kthime të detyrueshme dhe 406 (51%) ishin kthime vullnetare. Këto operacione pritet të intensifikohen më tej në muajt në vijim”, thuhet në reagimin e Home Office.
Në deklaratën zyrtare të dy palëve thuhet se dy shtetet do të luftojnë për t’i dhënë fund migracionit të paligjshëm, ku sipas tyre pengon seriozisht prosperitetin dhe sigurinë e qytetarëve dhe mundëson kriminalitetin, shfrytëzimin dhe forma të tjera të paligjshmërisë.
