Policia e Kukësit ka finalizuar me sukses operacionin policor të koduar “Episodi”, duke vënë në pranga dy shtetas të përfshirë në një ngjarje të rëndë kriminale të ndodhur më 5 shtator në lagjen nr. 5 të qytetit.
Sipas njoftimit të Policisë, më datë 5 shtator 2025, rreth orës 21:00, gjatë një konflikti për motive të dobëta, u qëllua me armë zjarri në drejtim të shtetasit H. A. Fatmirësisht, nga të shtënat nuk pati të lënduar.
Pas hetimeve intensive dhe grumbullimit të informacioneve në rrugë operative, forcat e Drejtorisë Vendore të Policisë Kukës identifikuan dhe arrestuan autorin e dyshuar të ngjarjes, shtetasin F. (U.) D., 47 vjeç, banues në fshatin Pobreg.
Ky shtetas, i dënuar më parë për armëmbajtje pa leje, akuzohet tani për veprat penale “Vrasja”, mbetur në tentativë, dhe “Mbajtja pa leje e armëve, armëve shpërthyese dhe municionit”.
Gjithashtu, në kuadër të këtij operacioni u vu në pranga edhe djali i motrës së autorit, shtetasi S. J., 23 vjeç, banues në Kukës, i cili akuzohet për veprën penale “Moskallëzimi i krimit”, pasi dyshohet se ka qenë i pranishëm gjatë konfliktit dhe nuk ka njoftuar autoritetet për krimin.
Materialet procedurale i janë referuar tashmë Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme ligjore.
