TIRANË– Deputetja e Partisë Demokratike Jorida Tabaku ka komentuar ditën e sotme situatën në Partinë Demokratike kur tashmë është fakt që deputetët kanë nisur mbledhjen e firmave për shkarkimin e Enkelejd Alibeajt nga kryetar grupi dhe zgjedhjen e Ervin Salianjit. Tabaku tha se nuk kishte dijeni për këtë pasi askush nuk e kishte thërritur në mbledhje grupi. Ajo shtoi se grupi parlamentar e ka një kryetar në krye dhe se të gjitha këto përpjekje e dëmtojnë Partinë Demokratike.
Jordida Tabaku: Besoj që të gjithë më keni ndjekur në diskutime e mia në këtë periudhë në PD që kam qenë konstruktive. Nuk më ka thirrur askush për mbledhje grupi, nuk kam asnjë dijeni për mbledhje firmash dhe proces tjetër. Qëllimi im është ta bëjmë PD-në alternativë dhe forcë fituese. Është e papranueshme sot që opozita është më pak e besueshme sesa qeveria. Unë do të punoj çdo që kjo të ndodhë sa më shpejt. Asnjëherë se kam menduar që PD të shkojë në këtë rrugë. Ka një kryetar grupi që mirë apo keq po e bën punën e tij. Copëzimi i mëtejshëm nuk e ndihmon PD-në.
