DURRËS– Kjo e hënë ka shënuar finalizimin e nënshkrimit të marrëveshjes për zhvillimin e projektit “Durrës Yacht & Marina”. Në ceremoni ishte i pranishëm vetë investitori Mohammed Alabbar. Lajmin e ka bërë të ditur kryeministri Edi Rama, i cili shkruan në Facebook se ky do të jetë projekti më i rëndësishëm turistik. Ndërkohë vetë Alabbar u shpreh i emocionuar dhe tha se ishte gati të lëshonte “lot gëzimi”.
Mohammed Alabbar: Jam gati të lëshoj lot gëzimi, ju falenderoj nga zemra, ky është një projekt kaq i madh. Këta njerëz që punojnë me ne po drejtojnë një nga projektet më të mëdha në botë.
POSTIMI I RAMËS:
Gati me të gjitha tanimë për projektin më të rëndësishëm turistik, investimi më i madh i huaj në historinë tonë dhe ndoshta të rajonit, i cili do të transformojë rrënjësisht Durrësin, duke e vendosur në radhën kryesore të destinacioneve turistike në Mesdhe, me një impakt të thellë ekonomik jo vetëm për qytetin bregdetar po për të gjithë vendin Nënshkrimi i marrëveshjes për zhvillimin e projektit “Durrës Yacht & Marina” është finalizimi i i një rruge të gjatë pune voluminoze, në aspektin tekniko-ligjor, me një investitor të madh strategjik prestigji i të cilit është botërisht i njohur.
