TIRANË– Kryetari i Partisë Demokratike Sali Berisha është ndalur sërish ditën e sotme tek rrëzimi i kërkesës së paraqitur nga deputetët demokratë në Kuvend në lidhje me ngritjen e Komisionit Hetimor për fluturimet e kryeministrit Edi Rama me çarter që sipas PD-së i kanë kushtuar buxhetit të shtetit 22 milionë euro. Duke folur në mbledhjen e grupit parlamentar kreu i selisë blu tha se me urdhër të kreut të qeverisë kjo kërkesë u hodh poshtë por që sipas tij PD do i shkoj deri në fund kësaj çështjeje
Sali Berisha: Ligji parashikon, Kushtetuta parashikon kontrollin e pushtetit nga opozita, parashikon komisionet hetimore parlamentare. Në këtë kontekst, u mblodhën firmat dhe u dorëzua kërkesa për të hetuar Edi Ramën. Sepse një njeri, që kryen 136 udhëtime me çarter, në një kohë kur qytetarët e tij, me mijëra e mijëra rrezikojnë jetën në gomone, është i degraduar në çdo lloj aspekti. Nuk po flas për transportin që bën avioni i tij të parave dhe lëndëve të tjera, nuk po ndalem këtu. Nuk po ndalem këtu në fluturimet e tij që janë para Ismailit, që janë në hetim absolut ndërkombëtar, jo në një, por në dy vende. Që ai ka pasur Duçkën e tij drejtor aty ai. Edhe këtu mund të ndalemi, por ne po ndalemi në 136 fluturime, 22 milionë euro. Dhe duhet të ndalemi. Në çdo vend të botës, ky përbën një superskandal. Cila është përgjigjia? Përgjigjia: është e rrëzojmë në kryesinë, ku nuk kanë asnjë kompetencë për rrëzimin e saj. Ajo është e drejtë e patjetërsueshme e deputetëve. I ka dhënë përgjigje përfundimtare Gjykata Kushtetuese, edhe në person për Edi Ramën. Ky nuk do të na lejojë ne të hetojmë. Ne do e hetojmë atë në çdo qelizë. Do e hetojmë në gjithçka, do e hetojmë në çdo gjë që dyshohet se janë vjedhur taksapaguesit shqiptarë.
