LEZHË– Të tjera detaje kanë dalë në dritë në lidhje me ngjarjen e rëndë të ndodhur mbrëmjen e djeshme në Dajç të Lezhës ku ekipet e Forcave të Ndërhyrjes së Shpejtë FNSH mësynë në shtëpinë e Artan Gjinajt dhe terrorizuan gruan dhe fëmijët në mes të natës. Në momentin e ngjarjes kryefamiljari nuk ka qenë në banesë pasi punon në Malin e Zi por është kthyer sapo është marrë në telefon nga bashkëshortja.
Ngjarja në fillim pasoi me dyshime të mëdha nëse kishim të bëjmë vërtetë me punonjës policie pasi mënyra e mësymjes ishte e rëndë dhe e dhunshme. Para mediave e zonja e shtëpisë që në atë moment ishte vetëm në banesë deklaroi se efektivët e FNSH kanë tentuar të futen në fillim nga dritaret pasi i kanë goditur fort duke bërë që dy fëmijët e mitur, djali dhe vajza të terrorizohen. Në atë moment ajo shprehet se ka dalë dhe është “përballur” me ta. Pasi kanë bërë kontroll ata janë larguar.
Sipas News 24 personat e maskuar dhe me armë kanë qenë vërtetë efektivë të policisë të mbështetur nga skuadra e Forcave të Ndërhyrjes së Shpejtë ata që kanë ushtruar kontroll. Sipas burimeve nga policia e Lezhës i është konfirmuar se para ndërhyrjes, salla operative është njoftuar nga Policia e Shkodrës për këtë aksion. Sipas të dhënave të deritanishme, shkak për kontrollin janë bërë dyshimet se në banesën e familjes Gjinajt, fshihej një person i shpallur në kërkim, i cili është i afërmi i familjes Gjinaj. Megjithatë ende nuk dihet se për kë bëhet fjalë.
