TIRANË– Ministrja e Infrastrukturës dhe Energjisë, njëherazi dhe zëvendëskryeministre Belinda Balluku ka marrë pjesë këtë të martë në Forumin e Ekonomik që po mbahet në Tiranë që prej ditës së djeshme. Gjatë fjalës së saj Balluku tha se shumë shpejt do të nisë puna për të krijuar një pistë të re në aeroportin e Rinasit ku mund të ulen edhe avionë transoqeanikë.
Belinda Balluku: Aeroportin e Tiranës do ta kemi me parametra totalisht të rinj, ku ka një terminal shtesë që funksionon prej disa muajsh. Dhe nga ana tjetër po përgatitet për të ridimensionuar pistën e aeroportit ndërkombëtar të Tiranës, kompania e cila menaxhon këtë aeroport për ta kthyer atë në një aeroport të aksesueshëm edhe nga avionët transoqeanikë. Por ndërkohë në Vlorë, kantieri po ecën me hapa të shpejtë për të dorëzuar në vitin 2025 aeroportin më të madh në rajon, me një pistë 3.2 km.
