KRUJË– Ka marrë fund arratia për 23-vjeçarin e identifikuar me inicialet D.L nga Kruja. Ai u vu në pranga këtë të premte në Pikën Kufitare të Morinës pasi ishte shpallur në kërkim nga policia pasi së bashku me dy vëllezërit e tij binjakë, të arrestuar tashmë e kishin kthyer banesën e tyre në “depo” armësh. Në shtëpinë e tyre u sekuestruan 1 armë zjarri automatik, 1 armë zjarri pushkë, 2 krehra automaktiku, municion luftarak dhe 1 bajonetë.
NJOFTIMI I POLICISË:
Në kuadër të shkëmbimit të menjëhershëm të informacioneve me shërbimet e Policisë Kufitare të PKK Morinës, me qëllim ndalimin e një shtetasi të shpallur në kërkim, si rezultat i hetimeve të kryera në vijim të operacionit policor të koduar “Twins”, të zhvilluar më 23 shkurt, u kap në Morinë, si dhe u ndalua nga specialistët e Seksionit për Hetimin e Krimeve të Komisariatit të Policisë Krujë, shtetasi i shpallur në kërkim nga Policia e Krujës, për veprën penale “Mbajtja pa leje dhe prodhimi i armëve, armëve shpërthyese dhe i municionit”:
Nga hetimet ka rezultuar se shtetasi D. L., së bashku me 2 vëllezërit e tij binjakë, të arrestuar në kuadër të operacionit “Twins”, mbanin në banesë 1 armë zjarri automatik, 1 armë zjarri pushkë, 2 krehra automaktiku, municion luftarak dhe 1 bajonetë, të cilat u gjetën dhe u sekuestruan gjatë këtij operacioni. Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.
