Tifozët e Napolit janë shumë pranë që të shohin, pas 33 vjetësh, ardhjen nën Vezuv të titullit të tretë në historinë e klubit.
Në prag të momentit shumë special, që mund të ndodhë edhe të dielën, tifozët e klubit të kaltër kanë shfrenuar fantazinë duke dërguar një mesazh për rivalët e tyre.
Ata improvizuan një varrezë, ku fiksuan kryqe që kishin të vizatuara emblemat e kundërshtarëve të këtij sezoni në Serinë A.
Përveç kësaj, në qendër u vendos një arkivol ku ishin vendosur shalle me katër skuadrat e mëdha nga Italia Veriore, Juventus, Milan, Interi dhe Torino, urrejtja ekzistuese mes jugut dhe veriut të “Çizmes” që fatkeqësisht është me famë botërore.
Mesazhi i shfaqur ishte më shumë se sugjestiv: “Për të gjithë Italinë, një dhimbje mizore/ Pas kaq vitesh, të vendosa në kryq”, duke aluduar se Napoli nuk ka fituar një titull, që nga viti 1990, në një kohë kur Diego Armando Maradona vazhdonte të performonte në stadiumin që tani mban emrin e tij.
Napoli është tani vetëm një fitore larg titullit të tretë në historinë e tyre me 7 raunde të mbetura për të luajtur në këtë sezon të Serisë A. Skuadra e Luciano Spallettit ka 17 pikë epërsi ndaj Lazios të vendit të dytë.
Nëse Napoli fiton të dielën në shtëpi kundër Salernitanës, dhe Lazio nuk fiton jashtë fushe kundër Interit, atëhere të dielën, do të nisi zyrtarisht festa për titullin. Nëse ky skenar nuk realizohet, skuadra e Spallettit do të mund ta marrë matematikisht titullin në ndeshjen tjetër, kur do të udhëtojë për duelin ndaj Udineses.
Përveç kampionatit të vitit 1990, Napoli ishte edhe “mbretëresha” e Italisë në vitin 1987, kjo falë edhe legjendarit Diego Armando Maradona. Tani, Victor Osimhen dhe Khvicha Kvaratskhelia janë idhujt e rinj të tifozëve napolitan.
Vitet e fundit, skuadra bardheblu iu afrua shumë titullit të Serisë A në sezonin 2017-2018, kur u ndal në metrat e fundit ndaj rivalëve të tyre të mëdhenj Juventus.
