Deputetja e PD, Oriela Nebiaj doli kundër vendimit të Gazment Bardhit një ditë më parë dhe mori pjesë në mbledhjen e Kuvendit Kombëtar demokrat.
Nebiaj është pritur nga disa simpatizantë të PD në shkallët e Pallatit të Sportit “Asllan Rusi” dhe është shoqëruar për në ambientet e brendshme.
Në momentin e mbërritjes së Nebiajt, Lulzim Basha u ngjit në podium dhe mori fjalën.
Entuziazmi i mbështetësve ishte maksimal në ato çaste, sidomos kur Lulzim Basha fjalimin e tij, të gjatë rreth 60 minuta, e nisi me fjalët: “Epo, na kishte marrë malli të mblidheshim”.
Ovacionet e delegatëve dhe simpatizantëve të PD nuk kanë munguar gjatë gjithë takimit.
Një burim tha për Newszone.al se Oriela Nebiaj e ka patur të vështirë t’i kontrollojë emocionet dhe në një moment është parë e përlotur nga entuziazmi i demokratëve.
Situata në PD mbetet kaotike pas një konflikti 2-vjeçar në mesin e demokratëve.
Sali Berisha ka shkëputur nga PD një grupim dhe e quan atë Foltorja ose Rithemelimi, ndërsa Lulzim Basha përfaqëson PD-në zyrtare.
Bashkëpunimi mes dy grupimeve duket gjithnjë e më i largët po t’i referohemi retorikës së dy liderve, pavarësisht nga ftesa që një ditë më parë Lulzim Basha pati për mbështetësit e Foltores.
/ Newszone
