TIRANË– Ka shkuar në katër numri i personave të arrestuar në lidhje me vrasjen e biznesmenit Ardian Nikulaj në Shëngjin. Policia e Shtetit përmes një njoftimi për mediat bën me dije se është arrestuar britanikja Harriet Bridgeman, e reja që dyshohet të jetë bashkëpunëtore me grupin që ekzekutoi Nikulajn mesditën e 19 prillit. Ajo pritet të ekstradohet drejt vendit tonë së bashku me Edmond Haxhinë dhe dy britanikët e tjerë të përfshirë në ngjarje.
NJOFTIMI I POLICISË:
Policia e Shtetit. Në vijim të punës kërkimore për lokalizimin dhe kapjen e personave të shpallur në kërkim për vrasjen e shtetasit Ardian Nikulaj, falë bashkëpunimit të ngushtë mes Policisë shqiptare dhe asaj britanike, pas shkëmbimit të informacionit, lokalizohet, kapet dhe vihet në pranga, me qëllim ekstradimin drejt Shqipërisë, shtetasja britanike H. B. Ndërkohë, Policia e Shtetit vijon intensivisht punën, në bashkëpunim të ngushtë me partnerët, për lokalizimin dhe kapjen edhe të 2 personave të tjerë të shpallur në kërkim në lidhje me ngjarjen.
