TIRANË– Fotot e mëposhtme tregojnë pasojat e dhunës së tmerrshme të ushtruar ndaj 28-vjeçares, e cila u mbajt peng për shtatë ditë dhe u dhunua në mënyrë barbare nga bashkëjetuesi i saj tashmë i arrestuar Gleard Gusholli. Pamjet e publikuara nga Top Channel tregojnë plagët në fytyrë krah, vesh, qafë por dhe shumë të tjera që janë në pjesët e tjera të trupit si këmbë dhe bark.
28-vjeçarja është dhunuar sistematikisht me sende të forta, këmbë karrigeje, grushta e shkelma nga Gusholli. Ajo është shpëtuar nga motra e autorit, e cila ka shkuar në banesë dhe ka parë gjendjen ku ndodhej e reja. Më pas e ka dërguar në një spital privat ku ngjarja u raportua në polici. Motra e autorit është marrë në pyetje nga blutë e Komisariatit numër 2 ku i ka dërguar dhe në apartamentin ku 28-vjeçarja është mbajtur. Aty, policia ka mbledhur dhe provat materiale në lidhje me ngjarjen e rëndë. Po ashtu bashkë me Gleard Gushollin në pranga kanë rënë dhe katër persona të tjerë të cilët e kanë ndihmuar në krim dhe kanë fshehur ngjarjen. Mes të arrestuarve është dhe kunati i autorit. Ky i fundit e ka ndihmuar Gushollarin që të largohet e të fshihet në zonën e Zogut të Zi ku dhe është kapur nga policia.
